Isa patay, higit 100 sibilyan nailigtas

Isa ang patay habang ilan pa ang sugatan sa mga sibilyang na-rescue ngayong araw sa siyudad ng Marawi .

Ayon sa Balitang Ahensiya ng Ahlul-bayt (ABNA24) - Namatay ang isang 70-anyos na lola nang tamaan ng sniper, at ilan pa sa mga sibilyan ang naiulat na patay sa loob ng lugar g digmaan. Hindi pa naman nakukuha ang bangkay ng nasabing lola.

Samantala, mahigit 100 sibilyan ang nakuha ng militar at rescuers ng Local Government Unit (LGU) ngayong araw.

Pero sugatan nang ilabas sa war zone ang isa sa mga sibilyan na si Marjon Danio na may tama ng bala sa kanang hita.

"Bigla na lang may pumasok na bala sa bintana tapos tinamaan na ako. Pababa ‘yung tama, hindi ko na alam kung sa ISIS ba o sa mga sundalo," kuwento ni Danio.

Muntik na ring tamaan ng sniper ang isa pang sibilyan na si Diosdado Jamero at nakuha pa niya ang balang muntik nang tumama sa kanya.

"Biglang may pumutok, ito dumaan sakin, muntik muntikan na, ito ay isang napaka-nakakatakot na sitwasyon,” ayon kay Jamero.

May mga na-rescue din sa moske kasama ang Islamikog iskolar na nakausap pa umano ang Maute.
"Kung totoo man yung dinadala nilang jihad, sana tanggapin ng Allah. Pero sa ganitong panahon na mismo nahihirapan mga kapwa nila Muslim, mapapatawad pa kaya sila ng Allah?” ani Muhammad Moka Tumog.

Sa Barangay Banggolo, nakatawag pa ang isang nakaligtas na si Abdullah Jalal Rascal pero sugatan din ito at nauubos na ang dugo. Hindi naman siya makuha dahil patuloy pa ang bakbakan sa lugar niya.

Labi ng isang sundalong nasawi sa bakbakan sa Marawi, naiuwi na sa pamilya
Bumuhos ang emosyon sa pag-uwi ng mga labi ni Technical Sergeant Aldrin Dinglasan sa kaniyang tahanan sa Barangay Sebastian nitong Sabado.

Si Dinglasan ay isa sa mga sundalong nasawi sa patuloy na bakbakan sa pagitan ng mga pwersa ng gobyerno at mga teroristang Maute.

Yakap ang larawan ng asawang pumanaw, kinuwento ni Lea ang plano sana ni Dinglasan na magretiro ng maaga. Suot naman ng kanilang bunsong anak na si Achilles ang sombrero ng pumanaw na ama.

“Sabi niya pagkatapos niya ng pagre-retire, magtratrabaho pa rin siya. Sabi pa nga po niya, sa Customs muna siya kasi nandun si sir [Commissioner Nicanor] Faeldon, tapos habang naghihintay siya ng tawag sa Canada, kasi may apply din siya sa Canada, kasi sabi niya, hindi na lang niya kami pwedeng pabayaan na lang ng ganun,” ani Lea.

“Hindi na tayo nakapagsabi ng ‘I love you’ sa isa’t-isa, kaya pala nung araw na yun, wala akong kagana-gana, yun pala may nangyari na sa’yo, pa,” dagdag pa nito.

Dalawampung taong nanilbihan si Dinglasan bago siya nasawi noong Miyerkoles habang nagsasagawa ng combat clearing operation sa Barangay Lilod Madaya sa Marawi.

Inilarawan naman ni 2nd Lt. Jerby Alparaz ang kasamahang si Dinglasan bilang isang mabuting kaibigan at taga-payo.

“Sa katunayan, si Tap Dinglasan parang tatay ko na yan eh so siya lahat nagbibigay ng payo sa akin pagdating sa ikagaganda ng serbisyo ko. At the same time, guro ko siya eh sa lahat ng bagay, sa pakikipagbakbakan. Sa lahat ng pagsasanay kasama ko siya,” ani Alparaz.

Kasamang nakiramay sa pamilya Dinglasan ang malalapit na kaanak at ilang sundalong Marino na nag-eskort sa labi ng yumaong sundalo pauwi mula Fort Bonifacio.

Nakatakda namang isagawa sa susunod na linggo, Sabado, ang pagsunog at libing ng nasawing sundalo.