Hinahanap parin ang pugad ni Hapilon

Patuloy na inaalam ng mga otoridad ang pinagpupugaran ng Abu Sayyaf lider at sinasabing emir ng ISIS sa Pilipinas na si Isnilon Hapilon at mga dayuhang terorista sa isang barangay sa Marawi City kung saan napatay ang 13 miyembro ng Philippine Marines.

Naiulat sa Balitang Ahensiya ng Ahlul-bayt (ABNA24) - Ayon kay Armed Forces of the Philippines spokesman Brig. Gen. Restituto Padilla, naniniwala sila na sa naturang lugar nagtatago si Hapilon kasama ang ilan pang mga dayuhang terorista.

Sinabi pa ni Padilla na posibleng nasa Mindanao pa ang mga dayuhang terorista bago pa man sumiklab ang kaguluhan sa Marawi City noong May 23.

Napag-alaman na noong nakaraang Biyernes, napatay ang labintatlong Marines habang sugatan ang apatnapung iba pa sa pakikipagsagupa sa mga bandido sa Barangay Lilod Madaya sa Marawi.

Malaki aniya ang posibilidad na nasa lugar si Hapilon kung kaya ang naturang barangay ay punung-puno ng mga miyembro ng Maute group.
Naniniwala din ang AFP na mayroong mga sibilyan na bihag ang Maute group sa nasabing barangay at tanging layunin ng Marines ay bigyan ng seguridad ang mga bihag na sibilyan sa nasabing barangay.

Matapos ang insidente, babawasan na aniya ng militar ang airstrikes at sisikapin na madagdagan naman ang ground assaults sa mga lugar na hawak pa rin ng Maute group.
Sa ngayon ay hindi pa nila masasabi kung ilang Maute members at foreign fighters ang nananatili pa rin sa Marawi City, kabilang na sa Barangay Lilod Madaya.

Mailalabas lamang ani¬ya ang mga detalye ukol sa dayuhang terorista kapag natapos na ang operasyon sa Marawi City.

Samantala, tumutulong na ang special forces ng Amerika sa ating pamahalaan para tugisin at pulbu¬sin ang puwersa ng Maute group sa Marawi City.

Batay sa ipinalabas na pahayag ng U.S.Embassy sa Maynila, sinabi nito na humingi ng tulong sa kanila ang pamahalaan para sa mabilis na pagsugpo sa nasabing grupo.

Kinumpirma naman ito ni Lt/Col. Jo-ar Herrera, tagapagsalita ng 1st infantry division ng army ngunit sinabi nito na hanggang tactical support lamang ang ibinibigay ng U.S. troops at hindi sila kasama sa aktwal na combat operations.