OFWs sa Gitnang Silangan baka bawasan pa kung pang-aabuso di titigil

Nakahanda ang gobyerno na bawasan pa ang mga overseas Filipino worker (OFW) na pinadadala sa Gitnang Silangan kung magpapatuloy ang pagdami ng mga kaso ng pang-aabuso, sabi ni Labor Secretary Silvestre Bello.

Ayon sa Balitang Ahensya ng Ahlul-bayt (ABNA24)- Binitiwan ni Bello ang pahayag kasunod ng ipinalabas niyang utos noong Disyembre na bawasan ng 10 porsiyento ang OFW deployment sa buong Middle East bunsod ng mga kaso ng pang-aabuso sa mga manggagawang Pinoy doon at base na rin sa rekomendasyon ng mga labor attache.

"Kami ay handang magpadala ng ating manggagawa sa ibang bansa doon pero kapag naroon na sila, sila ay dapat na itinuturing bilang mga tao," ani Bello.

"Ngunit kung lumalala ito, hindi natin maaaring limitahan sa 10 [persento], ito ay maaaring pumunta kahit mas mataas," dagdag ni Bello.

Nilinaw rin ni Bello na hindi dapat mag-alala ang mga skilled worker dahil household service workers ang target nilang limitihan dahilang mga ito raw ang kadalasan nakararanas ng pang-aabuso.

Pero ayon kay Overseas Workers Welfare Administration (OWWA) administrator Hans Leo Cacdac, may iba pang klase ng OFWs na lantad sa pang-aabuso.

Bukod sa 1,000 hanggang 2,000 runaways na laging nasa shelters ng Pilipinas sa Middle East, libo-libo rin ang stranded workers mula sa mga nagsasarang construction company.

"Halimbawa, mga tagalinis o kaya sabihin natin iyong mga lower-skilled construction workers, kailangan din nating tingnan ang kanilang situwasyon," ani Cacdac.

Sumang-ayon naman ang non-government organization na Blas F. Ople Policy Center and Training Institute na bawasan ang deployment ng mga OFW sa Gitnang Silangan.

Pero dapat daw ay may trabahong mapapasukan sa bansa ang mga hindi made-deploy na manggagawa.

Kung hindi raw kasi mapapalitan ang mawawalang oportunidad, baka pumatol lang ang ilang nagpupumilit makaalis ng bansa sa mga illegal recruiter.



.......
/328