Hustisya ang sigaw

Sumisigaw naman ng hustisya ang mga namatayan sa naturang insidente at dapat daw ay may managot sa nangyaring trahedya.

Ayon sa Balitang Ahensiya ng Ahlul-bayt (ABNA24) - Isang vigil naman ang isinagawa sa hotel ang casino complex para sa mga biktima.
Ayon sa mga naulila, kung maagap lang umano ang pag-aksiyon ng mga awtoridad, buhay pa sana ang kanilang mga mahal sa buhay.

"Iyong mga rumesponde doon, mga duwag!" sigaw ng isang kaanak ng namatay.

Sariwa pa rin kay Regan Ala ang sakit ng biglang pagkamatay ng kanyang bunsong kapatid na si Merylle. Ayon sa kanya, kung maaga lang sanang dumating ang mga rumespanding grupo at mga pulis, naisalba pa sana ang buhay ng mga biktima.

Maliban sa tulong sa pagburol at pagpapalibing, bibigyan din ng Resorts World Manila ng P1 milyon ang pamilya ng mga namatay, ayon kay Steve Reilly, ang chief operating officer ng casino complex.

Nagpaabot din siya ng pakikiramay, at sinabing umaasa siyang makatulong kahit paano ang iaabot na pera sa panahong ito ng pagluluksa.