Pinagbabaril at napatay ng Maute-Islamic State of Iraq and Syria (ISIS) ang limang sibilyan na na-trap sa bakbakan habang walo ang binihag at 15 naman ang nasagip kabilang ang 10 pulis sa patuloy na krisis sa Marawi City na nasa ika-22 araw na kahapon.
Inuulat ng Balitang Ahensiya ng Ahlul-bayt (ABNA24) - Ayon kay Major Gen. Rolando Joselito Bautista, Commander ng Task Force Marawi, nitong Lunes nabahiran ng trahedya ang paggunita sa ika-119 taong Araw ng Kasarinlan sa bansa matapos masawi ang limang sibilyan.
Ayon sa mga survivors may mga kumatok sa bahay na kanilang pinagtataguan na noong una ay inakala nilang tropa ng pamahalaan at nang pagbuksan ng pinto ay mga armadong Maute-ISIS.
Nagtatakbo sa likurang pintuan ang mga sibil¬yan patungong ilog, pero hinabol sila ng mga te¬rorista at pinagbabaril at minalas na tamaan ang lima sa mga ito na tuluyang binistay ng bala.
“The terrorists ran after them and indiscriminately fired at them killing five of the civilians and ta¬king the remaining eight as hostages,” anang opis¬yal habang lima pa ang masuwerteng nakaligtas matapos sumisid hanggang sa matagpuan ng tropa ng mga sundalo.
Bandang alas-5:30 naman ng umaga nang masagip sa bahagi ng Bangolo Bridge ang limang pulis na sina PO3 Ricky Alawi, 43-anyos PO1’s Esmael Adao, 34; Lumna Lidasan, 44; Ibrahim Wahab, 32 at Bernard Villariz, 52-anyos gayundin ang mga kasama ng mga itong sibilyan na nakilala namang sina Jene¬ber Velasquez, 26 ; Rodel Alico, 24; Jerald Docallos, 16; Mateo Velasquez, 33 at Analices Mari, 32.
Ayon kay Chief Supt. Reuben Theodore Sindac, Director ng Police Regional Office Director ng Autonomous Region in Muslim Mindanao (ARMM) ang nasabing mga pulis ay kabilang sa mga una nang napaulat na nawawala sa lungsod matapos na maipit sa bakbakan.
Ayon sa mga pulis, naubusan umano sila ng bala sa gitna ng bakbakan at hindi maiwan ang nasabing mga sibilyan dahilan sa papatayin ang mga ito sapagkat hindi sila marunong magsalita ng Maranao, isa sa mga lengguwahe ng mga Muslim.
Magugunita na una nang nakatakas si PO2 Khomennie Mamalapat, nakatalaga sa Patani Police Assistance Center sa Brgy. Patani, Marawi City. Ang nasabing pulis ay na-trap sa bakbakan sa pag-atake ng Maute-ISIS na nakatakas noong Hun¬yo 4, 2017 bandang ala-1:00 ng madaling araw.
13 Hunyo 2017 - 23:14
News ID: 836326
Pinagbabaril at napatay ng Maute-Islamic State of Iraq and Syria (ISIS) ang limang sibilyan na na-trap sa bakbakan habang walo ang binihag at 15 naman ang nasagip kabilang ang 10 pulis sa patuloy na krisis sa Marawi City na nasa ika-22 araw na kahapon.
