Isang taon na tagumpay ang giyera sa droga

Buong pagmamalaking idineklara ni Philippine National Police (PNP) Chief P/Director General Ronald “Bato” dela Rosa na tagumpay ang giyera sa droga na inilunsad ng administrasyon matapos itong sumapit na sa ika-isang taon kahapon.

Ayon sa Balitang Ahensiya ng Ahlul-bayt (ABNA24) - Gayunman, inamin ng PNP Chief na hindi nila inaasahan na talagang malala ang problema sa droga ng bansa at dahil dito’y magpapatuloy ang kanilang operasyon upang durugin ang mga big time drug syndicates at street level drug pushers sukdulang masakripisyo ang buhay ng mga pulis at konti na lamang ang matira sa mga ito.

“Nawalan na kami ng maraming tao, kaya handa kaming isakripisyo ang aming mga tauhan upang makamit ang isang pagbabago. Tulad ng sinabi ko na kami ay mabubuhay at mamatay kasama ang aming digmaan sa mga droga, magpapatuloy kami hanggang sa huling hari ng droga at hanggang sa huling drug pusher ',, pahayag ni dela Rosa kaugnay ng ipinangakong pagbabago ni Duterte sa inilunsad na anti-drug campaign.

Sinabi ni dela Rosa, isusumite ng PNP kay Pangulong Rodrigo Duterte ang kanilang “Real Numbers Game “ accomplishment report sa anti-drug campaign kung saan inaasahan namang ito ang iuulat sa bayan ng punong ehekutibo sa napipinto nitong State of the Nation Address (SONA) sa darating na Hulyo 24 ng taong ito.

Noong Hulyo 1 , 2016 sa pag-upo sa puwesto ni Pangulong Duterte ay inilunsad ng PNP ang Oplan Double Barrel at Oplan Tokhang upang tuldukan ang problema sa droga.

Ipinagmalaki naman ni dela Rosa na bagaman hindi pa tapos ang anti-drug campaign ay malaki na ang naging tagumpay ng kampanya dahilan marami na ang nalipol na mga drug personalities at makakapaglakad na ang mga mamamayan sa mga kalsada ng walang gumagambalang mga adik sa kanilang daraanan.

Sa ipinalabas na data ng PNP mula Hulyo 1 ng nakalipas na taon hanggang Hunyo 20 ng taong ito ay nasa 1, 308,708 na ang mga sumukong drug personalities at nasa 3,200 ang mga napatay na tulak at drug user matapos na manlaban sa mga operatiba ng pulisya.

Nagresulta rin ang operasyon sa pagkakasamsam ng 2,440.60 kilo ng shabu na nagkakahalaga ng P12.60 bilyon habang nasa 159 namang laboratoryo ng droga at drug den ang nalansag. Iniulat rin na 57 pulis ang nagbuwis ng buhay at 150 naman ang nasugatan.